曾智華 : 唔靚仔

廣東俗話，不少到肉又抵死，一矢中的。例如 —— 唔靚仔。

唔靚仔，在此並非形容一個人面容，而是，形容負責人處理一件事，手法是不漂亮，能否使人信服，有無夾硬嚟令所有相關人等俾大眾一個負面印象。

近日，我肥碌睇見兩單個案，就不禁叫出：

喂，咁搞法，唔多靚仔，渣啲喎！

第一件，乃監警會（獨立監察警方處理投訴委員會 Independent Police Complaints Council）慘變「被警監會」（被警察倒轉監察的委員會）。

監警會職責明確寫下 —— 監察和覆檢香港警務處投訴及內部調查科所調查的個案。

成立主因，眾所周知，為市民認為警方投訴科「自己人查自己人」不妥又欠公信力，故希望將投訴警察科獨立出來。

拉鋸下，監警會就誕生，此乃一個「妥協性產物」，一直以來，警方做好做醜都「扮」尊重監警會，直至今次警司朱經緯揮動警棍毆打途人被投訴個案出現。

投訴科竟堅拒監警會結論 —— 朱警司毆打證明屬實，搞到監警會秘書處建議委員再投票！

嘩！真係咁都得？有無醜樣啲？

第二件，香港大學校務委員會破天荒未按物色委員會建議，任命法律學院前院長陳文敏當副校長。

最「肉酸」為委員會主席梁智鴻醫生，唉，真真一世英名盡喪，被質問點解作出個前所未有嘅怪雞決定 ——「等埋首席副校長」時，真係解畫解到成口泡，如何令「港大人」信服？

我肥碌亦港大校友，當然一百個唔服！

以上個案，不僅唔靚仔，實屬醜死鬼！過去十幾年，香港權力架構「禮崩樂壞」，關邊個事？

原文刊於《經濟日報》（收費閱讀）